ନୂଆଦିଲ୍ଲୀ: ଭାରତ – ପାକିସ୍ତାନ ଯୁଦ୍ଧ ପରିସ୍ଥିତି ଭିତରେ ଭାରତ – ଆଫଗାନିସ୍ତାନର ସମ୍ପର୍କରେ ନୂଆ ଉଷ୍ମତା ଦେଖାଦେଇଛି। ବୈଦେଶିକ ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ଓ ଆଫଗାନିସ୍ତାନର କାର୍ଯ୍ୟକାରୀ ବୈଦେଶିକ ମନ୍ତ୍ରୀ ମୌଲଭୀ ଆମିର ଖାନ ମୁତ୍ତାକୀଙ୍କ ମଧ୍ୟରେ ଫୋନରେ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଛି। ତାଲିବାନ ଶାସନ ଆରମ୍ଭ ହେବା ପରେ ଏହା ପ୍ରଥମ ମନ୍ତ୍ରୀ ସ୍ତରୀୟ ଆଲୋଚନା। ଏହି ବାର୍ତ୍ତାଳପ ଏପରି ସମୟରେ ହୋଇଛି ଯେଉଁ ସମୟରେ ଭାରତର ଅନ୍ୟ ଏକ ଇସଲାମିକ ଦେଶ ପାକିସ୍ତାନ ସହିତ ଯୁଦ୍ଧ ସ୍ଥିତି ଭିତରେ ରହିଛି। ଆଲୋଚନା ଭିତରେ ଦୁଇ ଦେଶର ସମ୍ପର୍କରେ ଫାଟ ସୃଷ୍ଟି କରିବାର ଚେଷ୍ଟା ଉପରେ ମଧ୍ୟ କଥା ହୋଇଛି। ନିକଟରେ ପାକିସ୍ତାନ ସେନା କହିଥିଲା ଯେ ଭାରତ ଆଫଗାନିସ୍ତାନକୁ ମିସାଇଲ ଦ୍ୱାରା ଆକ୍ରମଣ କରିଛି। ଭାରତ ଏହାକୁ କିନ୍ତୁ ଖଣ୍ଡନ କରିଛି। ମୁତ୍ତାକୀ ମଧ୍ୟ ଏହି ଭିତ୍ତିହୀନ ରିପୋର୍ଟକୁ ଖାରଜ୍ କରିଛନ୍ତି। ସେ ଦୁଇ ଦେଶ ମଧ୍ୟରେ ବିଶ୍ୱାସ ବଜାୟ ରଖିବାକୁ ପ୍ରତିଶ୍ରୁତି ଦେଇଛନ୍ତି। ଡ. ଜୟଶଙ୍କର ଏକ୍ସରେ ଏହି ଆଲୋଚନା ବିଷୟରେ ସୂଚନା ଦେଇ କହିଛନ୍ତି, ଆଫଗାନ ବୈଦେଶିକ ମନ୍ତ୍ରୀଙ୍କ ସହ ସକାରାତ୍ମକ କଥାବାର୍ତ୍ତା ହୋଇଥିବା କହିଛନ୍ତି। ପହଲଗାମ ଆତଙ୍କବାଦୀ ହମଲାର ନିନ୍ଦା କରିଥିବାରୁ ମୁତ୍ତାକୀଙ୍କୁ ସେ ପ୍ରଶଂସା କରିଛନ୍ତି। ଭାରତ ଓ ଆଫଗାନିସ୍ତାନର ପାରମ୍ପରିକ ବନ୍ଧୁତ୍ୱକୁ ସେ ପୁଣି ଜୋର ଦେଇଛନ୍ତି। ଆଲୋଚନାରେ ଦୁଇ ଦେଶ ମଧ୍ୟରେ ସହଯୋଗ ବଢ଼ାଇବା ଉପାୟ ଖୋଜାଯାଇଛି। ଏପ୍ରିଲ ୨୮ରେ ବୈଦେଶିକ ମନ୍ତ୍ରଣାଳୟର ଯୁଗ୍ମ ସଚିବ ଆନନ୍ଦ ପ୍ରକାଶ କାବୁଲରେ ମୁତ୍ତାକୀଙ୍କୁ ଭେଟିଥିଲେ। ସେଠାରେ ଦ୍ୱିପାକ୍ଷିକ ବାଣିଜ୍ୟ ଓ ଅନ୍ୟାନ୍ୟ ସହଯୋଗ ବିଷୟରେ କଥା ହୋଇଥିଲା। ଜାନୁଆରୀରେ ବୈଦେଶିକ ସଚିବ ବିକ୍ରମ ମିଶ୍ରୀ ମଧ୍ୟ ମୁତ୍ତାକୀଙ୍କୁ ଭେଟିଥିଲେ। ପାକିସ୍ତାନ ମିଥ୍ୟା ଅଭିଯୋଗ ଆଣି ଦୁଇ ଦେଶର ସମ୍ପର୍କକୁ ନଷ୍ଟ କରିବାକୁ ଚେଷ୍ଟା କରିଥିଲା ବୋଲି କୁହାଯାଇଛି। ଏହି ଆଲୋଚନା ଦୁଇ ଦେଶର ବନ୍ଧୁତାକୁ ଆହୁରି ମଜବୁତ କରିଛି। ଏହି ବାର୍ତ୍ତାଲାପ ଭାରତ ଏବଂ ଆଫଗାନିସ୍ତାନ ସମ୍ପର୍କରେ ମିଳିତ ଭାବେ ସହଯୋଗ ବୃଦ୍ଧି କରିବାକୁ ପ୍ରତିବଦ୍ଧ। ଏହା ଆଞ୍ଚଳିକ ସ୍ଥିରତା ପାଇଁ ଏକ ବଡ଼ ପଦକ୍ଷେପ।
