ଭୁବନେଶ୍ୱର: ବଙ୍ଗୋପସାଗରରେ ଆଉ ଏକ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି। ଭାରତୀୟ ପାଣିପାଗ ବିଭାଗ (IMD) ପୂର୍ବାନୁମାନ କରିଛି ଯେ, ୨୭ ତାରିଖ ମଙ୍ଗଳବାର ଦିନ ପଶ୍ଚିମ- ମଧ୍ୟ ଏବଂ ଉତ୍ତର ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହେବାର ଅଛି। ଏହା ଓଡ଼ିଶା ଉପକୂଳ ଦେଇ ଉତ୍ତର- ଉତ୍ତର ପଶ୍ଚିମ ଦିଗରେ ଗତି କରିପାରେ। ଏହା ମୌସୁମୀକୁ ଆହୁରି ଶକ୍ତିଶାଳୀ କରିବ। IMDର ତାଜା ପାଣିପାଗ ରିପୋର୍ଟ ଅନୁସାରେ, ଦକ୍ଷିଣ ମଧ୍ୟପ୍ରଦେଶ ମରାଠୱାଡ଼ା ଓ ଉତ୍ତର ଅନ୍ତର୍ଦେଶୀୟ କର୍ଣ୍ଣାଟକରେ ସୃଷ୍ଟ ଏକ ଶକ୍ତିଶାଳୀ ଲଘୁଚାପର ଅବଶେଷ ମରାଠୱାଡ଼ା, ତେଲେଙ୍ଗାନା ଓ ଆନ୍ଧ୍ରପ୍ରଦେଶ ଦେଇ ଗତି କରି ପଶ୍ଚିମ- ମଧ୍ୟ ଓ ଉତ୍ତର- ପଶ୍ଚିମ ବଙ୍ଗୋପସାଗରରେ ପହଞ୍ଚିବ। ଏହା ସେଠାରେ ଏକ ନୂଆ ଲଘୁଚାପରେ ପରିଣତ ହେବ। ଏହା ପରେ ଓଡ଼ିଶା ଉପକୂଳ ଦେଇ ଉତ୍ତର ଦିଗକୁ ମୁହାଁଇବ, ଯାହା ବଙ୍ଗୋପସାଗରରେ ମୌସୁମୀ ସ୍ରୋତକୁ ଜୋରଦାର କରିବ। ତେବେ, NCEP GFS ମଡେଲ ଏକ ଭିନ୍ନ ସମ୍ଭାବନା ଦେଖାଉଛି। ଏହା ଅନୁସାରେ ୨୬ ମେରେ ପୂର୍ବ- ମଧ୍ୟ ବଙ୍ଗୋପସାଗରରେ ଏକ ଲଘୁଚାପ ଏବଂ ୨୭ ମେ’ ରେ ଏକ ଘୂର୍ଣ୍ଣିଝଡ଼ (ଡିପ୍ରେସନ) ସୃଷ୍ଟି ହୋଇପାରେ। ଏହା ଉତ୍ତର- ଉତ୍ତର ପଶ୍ଚିମ ଦିଗକୁ ଗତି କରି ୨୯ ମେରେ ବାଂଲାଦେଶ ଉପକୂଳରେ ଏକ ଗଭୀର ଘୂର୍ଣ୍ଣିଝଡ଼ ସୃଷ୍ଟିହେବ। ଏହି ସମସ୍ତ ପୂର୍ବାନୁମାନକୁ ବିଚାରକୁ ନେଇ IMD କହିଛି ଯେ, ୨୮-୨୯ ମେ ମଧ୍ୟରେ ବଙ୍ଗୋପସାଗରରେ ଘୂର୍ଣ୍ଣିଝଡ଼ ସୃଷ୍ଟି ହେବାର ସମ୍ଭାବନା ଅତି କମ। ଓଡ଼ିଶାରେ ଏହାର ପ୍ରଭାବ କେତେ ରହିବ ତାହା ଆଗାମୀ ଦିନରେ ସ୍ପଷ୍ଟ ହେବ। ତେଣୁ, ଉପକୂଳବାସୀଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି।
