ନୂଆଦିଲ୍ଲୀ: ଜାନୁଆରୀ ୨୨ରେ ହେବାକୁ ଯାଉଛି ରାମ ମନ୍ଦିର ପ୍ରାଣ ପ୍ରତିଷ୍ଠା ସମାରୋହ। ଅଯୋଧ୍ୟାରେ ନିର୍ମିତ ରାମ ମନ୍ଦିରର ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମ ଉପରେ ସମଗ୍ର ଦେଶବାସୀଙ୍କ ନଜର ରହିଛି। ଲୋକମାନେ ବିଶାଳ ଉଦଘାଟନକୁ ଅପେକ୍ଷା କରି ରହିଛନ୍ତି। ତେବେ ଏହି ସମାରୋହ ପୂର୍ବରୁ ଅଲ ଇଣ୍ଡିଆ ମଜଲିସ- ଏ- ଇତେହାଦୁଲ ମୁସଲିମିନ (ଏଆଇଏମଆଇଏମ୍) ସଭାପତି ଅସଦୁଦ୍ଦିନ ଓୱେସି ଏକ ବଡ଼ ଅଭିଯୋଗ କରିଛନ୍ତି। ସେ କହିଛନ୍ତି ଯେ ମୁସଲମାନମାନଙ୍କୁ ଯୋଜନାବଦ୍ଧ ଢଙ୍ଗରେ ବାବ୍ରି ମସଜିଦ ଛଡ଼ାଇ ନିଆଯାଇଛି। ରାମ ଜନ୍ମଭୂମି ମନ୍ଦିର ପ୍ରାଣ ପ୍ରତିଷ୍ଠାନର କାହାଣୀକୁ ଚ୍ୟାଲେଞ୍ଜ କରି ଓୱେସି କହିଛନ୍ତି, ୫୦୦ ବର୍ଷ ଧରି ସେଠାରେ ନମାଜ ପଢୁଥିବା ବେଳେ ଭାରତୀୟ ମୁସଲମାନ ମାନଙ୍କ ଠାରୁ ଯୋଜନାବଦ୍ଧ ଭାବେ ବାବ୍ରି ମସଜିଦ ଛଡ଼ାଇ ନିଆଯାଇଥିଲା। କଂଗ୍ରେସର ଜିବି ପନ୍ତ ଯେତେବେଳେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଥିଲେ। ରାତି ଅନ୍ଧାରରେ ମସଜିଦ ଭିତରେ ମୂର୍ତ୍ତି ରଖାଯାଇଥିଲା ଏବଂ ପରେ ସେମାନଙ୍କୁ ବାହାରକୁ ନିଆଯାଇ ନଥିଲା।
ଏହାସହ ଓୱେସି କହିଛନ୍ତି ଯେ ସେତେବେଳେ ଜିଲ୍ଲାପାଳ ଥିଲେ ନାୟାର ସାହେବ। ସେମାନେ ମସଜିଦ ବନ୍ଦ କରି ସେଠାରେ ପୂଜାର୍ଚ୍ଚନା ଆରମ୍ଭ କରିଥିଲେ। ଏହାପରେ ୧୯୮୬ମସିହାରେ ମୁସଲମାନମାନଙ୍କ କଥା ନ ଶୁଣି ମସଜିଦର ତାଲା ଖୋଲା ଯାଇଥିଲା। ୧୯୯୨ ଡିସେମ୍ବର ୬ତାରିଖରେ ସୁପ୍ରିମ୍ କୋର୍ଟଙ୍କୁ ପ୍ରତିଶ୍ରୁତି ଦେବା ସତ୍ତ୍ବେ ବିଜେପି ଓ ସଂଘ ପରିବାର ଏହି ମସଜିଦକୁ ସହିଦ କରିଥିଲେ ବୋଲି ସେ ଅଭିଯୋଗ କରିଛନ୍ତି। ଓୱେସି କହିଛନ୍ତି ଯେ ଯେତେବେଳେ ବିଶ୍ୱ ହିନ୍ଦୁ ପରିଷଦ ଗଠନ ହୋଇଥିଲା ସେତେବେଳେ ରାମ ମନ୍ଦିର ନଥିଲା।
